சக்தி கவிதைகள்

1

நீ இன்னும்
எவ்வளவு தூரம்
இப்படியே
பறந்து கொண்டிருக்கப்போகிறாய்
யென்றேன்
வானம்
எவ்வளவு தூரமோ
அதுவரைக்கும்
நான்
பறக்கப் போகிறேன் யென்கிறது
அக்குருவி
நீண்டுகொண்டே போகிறது
வானம்

---

2

நீண்ட நேரமாய்
ஓர் சிலுவையை வரைந்து கொண்டிருக்கிறேன்
ஆம்! நீங்கள் எதிர்பார்த்துக்கொண்டிருக்கும்
அச்சிலுவையைத் தான்
வரைந்து கொண்டிருக்கிறேன்
இன்னும் எத்தனை எத்தனை சிலுவைகளை
வரையப் போகிறேனென்று
எனக்கே தெரியவில்லை
உங்களின்
மனக்கைகளில் தான் இருக்கிறது
நான் வரைய போகும்
சிலுவைகளின் எண்ணிக்கைகள் !
என் பாவங்களை
முதலில் மன்னித்துக்கொள்ளுங்கள் இயேசுவே !
ஆணியைக் கொஞ்சம்
ஆழமாய் வரைந்து விட்டேன்

---

3

பழைய நினைவுகளை மனக்குகையிலிருந்து
பிசைந்தெடுத்து உறங்க வைக்க முற்படுகிறேன் இந்த இரவை!
இரவும் தூங்கிய பாடில்லை
நானும் உறங்கிய பாடில்லை
கசப்பான நினைவுகளை
அசைபோட்டுக் கொண்டே விழித்திருக்கிறேன்
விழியிலிருந்து லேசாய் வழிகிறது கண்ணீர்
போதும் போதும் யென்று
ஆவேசமாய்க் கத்துகிறது காரிருள்